Кыргыз Республикасынын Финансы министрлиги мамлекеттик жөлөк пулдарды каржылоо, анын ичинде үй-бүлөлөргө “балага сүйүнчү” менен “үй-бүлөгө көмөктү” төлөө маселеси боюнча түшүндүрмө берет.
“Кыргыз Республикасындагы мамлекеттик жөлөк пулдар жөнүндө” Кыргыз Республикасынын Мыйзамынын 2017-жылдын 28-июлундагы №163 редакциясында 2018-жылдын 1-январынан тартып ар бир балага төрөлгөндө бир жолу берилүүчү “балага сүйүнчүнү” төлөө белгиленген. Төлөөнүн ушул түрүнө 2018-жылга республикалык бюджеттин каражаттарынан 695,2 млн сом суммасында бюджеттик каражат бөлүүлөр каралган.
“Социалдык коргоо жаатындагы Кыргыз Республикасынын кээ бир мыйзамдык актыларына өзгөртүүлөрдү киргизүү жөнүндө” Кыргыз Республикасынын Мыйзамы кабыл алынып, 2018-жылдын 1-апрелинен тартып күчүнө кирген. Мыйзам “Кыргыз Республикасындагы мамлекеттик жөлөк пулдар жөнүндө” Кыргыз Республикасынын Мыйзамына 16 жашка чейинки балдары бар муктаж үй-бүлөлөргө алардын муктаждыгын эске алуу менен, башкача айтканда, даректүүлүктү эске алуу менен “үй-бүлөгө көмөк” ар айлык жөлөк пулун берүү жаатында өзгөртүүлөрдү киргизүүнү карайт.
Ошондой эле, Кыргыз Республикасынын жогоруда көрсөтүлгөн Мыйзамына ылайык үй-бүлөлөрдүн “үй-бүлөгө көмөккө” муктаждыгын аныктоодо 2018-жылдын 1-июлунан тартып үй-бүлөнүн кирешелеринен пенсиялардын бардык түрлөрү алынып салынат.
