Балдарды чет өлкөгө 13 жашка толгондон кийин жөнөткөн туура болот. Алгач балаңызды кайсы мамлекетке жөнөтүүнү тактап алыңыз – бул жерде биринчи кезекте келечекте балаңызды кандай ЖОЖго жөнөткүңүз келет, эгер америкалык болсо – сөзсүз АКШда да жакшы мектепти тандоо керек, европалык – Европада. Эгер балаңыз чет өлкөдө окуй ала тургандыгынан шек санасаңыз, анда аны алгач жайкы тил мектебине жөнөтүү зарыл.
Окуу жайын тандап алууда пикирлер, рейтингдеги орду, мектептин жайгашкан жери, бүтүрүүчүлөрдүн ийгилиги сыяктуу жагдайларга, ошондой эле балаңыздын өзгөчөлүгүнө карап тандап алуу керек. Белгилей кетүүчү жагдай, чет өлкөдө билим алуу – арзан ырахаттануу эмес, Америкадагы менчик мектептердеги бир жылдык билим алуунун баасы орточо 20 миңден 60 миң доллар, европалык мектептерде – 20–60 миң евро турат. Бир топ үнөмдүү варианттар да бар, ошондой эле кээ бир окуу жайларында жакшы жетишкендиги үчүн арзандатуулар жана стипендиялар каралган.
Эгер сиз англис тилин эркин сүйлөй алсаңыз, анда мектептерди өз алдынча издеп, алар менен байланышка чыга аласыз. Кокус кайсы мектепти тандоодон шек санасаңыз жана так эмне кылууну толук билбесеңиз, Кыргызстанда саны аз эмес ортомчулук фирмаларга кайрылыңыз. Алар сизге өлкөнү жана окуу жайды тандоодо, ошондой эле документ жана башка иш кагаздарын даярдоодо жардам беришет. Албетте, рынокто көптөн бери иштеген жана аз эмес жакшы пикирлерге ээ болуп, сыноодон өткөн фирмаларды тандаңыз. Мындай компаниялардын көрсөткөн кызматтарын текшерүү үчүн чет өлкөдө билим берүү боюнча өткөрүлгөн көргөзмөгө катышыңыз. Мындай иш чаралар Бишкекте көп өткөрүлгөндүктөн, ал жерде окуу жайлардын программалары жана окуу акысы тууралуу так маалымат алсаңыз болот.
