Кыргыз Республикасынын Финансы министрлигинде 2018-жылдын 15-февралында, Дүйнөлүк банктын «Кыргыз Республикасынын мамлекеттик сатып алууларынын потенциалын арттыруу» долбоорунун жабылышына арналган тегерек стол өттү. Иш-чарага Финансы министрлигинин жетекчилиги, Дүйнөлүк банктын Кыргызстандагы туруктуу өкүлү, министрликтердин, ведомстволордун жана эл аралык уюмдардын өкүлдөрү катышты.
Дүйнөлүк банктын «Кыргыз Республикасынын мамлекеттик сатып алууларынын потенциалын арттыруу» долбоору 2015–2018-жылдары 500 миң АКШ доллары өлчөмүндөгү гранттык суммага ишке ашырылды.
Белгилей кетсек, аталган долбоордун максаттары болуп төмөндөгүлөр саналат:
- институционалдык базаны жакшыртуу жана даттанууларды кароо боюнча комиссиянын жана мамлекеттик сатып алуулардын ыйгарым укуктуу органынын потенциалын өнүктүрүү;
- мамлекеттик сатып алуулар маселелери боюнча окутуу процессин өркүндөтүү жана мамлекеттик сатып алуулар жаатында адистер үчүн сертификаттоону киргизүү;
- мамлекеттик сатып алууларды натыйжалуу жүзөгө ашыруу жана контролдоо максатында мамлекеттик кызматчыларды, тооруктардын катышуучуларын жана көзөмөлдөө органдарынын кызматкерлерин окутуу жолу менен өнүктүрүүнүн эффективдүүлүгүн жакшыртуу.
«Кыргыз Республикасынын мамлекеттик сатып алууларынын потенциалын арттыруу» долбоорун ишке ашыруунун жүрүшүндө төмөнкүдөй иштер аткарылды:
- Даттанууларды кароо боюнча көз карандысыз комиссиянын иштөө тартиби жөнүндө жобо иштелип чыгып, бекитилди;
- «Сотко чейинки электрондук даттануу» модулу иштелип чыкты;
- Кыргыз Республикасынын Финансы министрлигине караштуу Мамлекеттик сатып алуулар департаментинин жаңы түзүмү бекитилди;
- Консультациялык кызмат көрсөтүүлөрдү тандоо боюнча колдонмо иштелип чыкты;
- 2018–2022-жылдарга Кыргыз Республикасынын мамлекеттик сатып алууларын өркүндөтүү жана натыйжалуулугун жогорулатуу боюнча программа бекитилди;
- Окуу борборунун электрондук тестирлөөнүн жана мамлекеттик сатып алуулар боюнча сертификаттарды генерациялоонун бирдиктүү маалыматтык системасы киргизилди.
