Кыргыз Республикасында «Айыл чарбасын каржылоо-6» жаңы долбоорунун каржылоо шарттары тууралуу Финансы министрлигине караштуу Бюджеттик насыяларды башкаруу боюнча мамлекеттик агенттиктин директорунун орун басары Жумгалбек Сагынов 2018-жылдын 19-февралында маалымат берди.
Айта кетсек, Кыргыз Республикасынын Өкмөтүнүн 2018-жылдын 14-февралындагы № 92 Токтому менен «Айыл чарбасын каржылоо – 6» долбоору бекитилген.
Чечим «Жаңы доорго кырк кадам» өкмөттүк программасын ишке ашыруу алкагында жана өлкөнүн ишкер субъекттерине жана жеке адамдарына 2018-жылдын жазгы талаа жумуштарын өз убагында жүргүзүү жана мал чарбачылыгын, өсүмдүк өстүрүүчүлүктү жана айыл чарба кооперациясын мындан ары өнүктүрүү үчүн мамлекеттик колдоо көрсөтүү максатында кабыл алынды.
Жумгалбек Сагыновдун айтымында, долбоордун алкагында 2018-жылдын ичинде өсүмдүк өстүрүүнү жана мал чарбачылыгын өнүктүрүү үчүн коммерциялык банктардын жана финансы-кредиттик мекемелердин финансылык каражаттары Кыргыз Республикасынын ишкер субъекттерине жана жеке адамдарына жеңилдетилген пайыздык ставка менен берилет.
Кыргыз Өкмөтү жеңилдетилген пайыздык ставкалар боюнча кредиттерди берүү үчүн коммерциялык банктардын жана финансы-кредиттик мекемелердин чыгымдарын 2018–2020-жылдарга республикалык бюджеттин каражаттарынын эсебинен субсидиялайт.
Долбоорго ылайык, өсүмдүк өстүрүү, мал чарбачылыгы үчүн жылына 10%дык ставка менен, айыл чарба продукциясын кайра иштетүү тармагына 6% менен, бак өстүрүүчүлүк менен алектенген субъекттер үчүн жылына 8%дык насыялар 3 жылга берилет.
Кыргыз Республикасынын 2018–2020-жылдарга республикалык бюджетинде «Айыл чарбасын каржылоо – 6» долбооруна 1 млрд 50 млн сом каражат каралган. Бул долбоорду максаттуу ишке ашыруу үчүн кошумча дагы шарттар аныкталган. «Мисалы, «мал чарбасы» тармагы үчүн жалпы каржылоонун 50%, «өсүмдүк өстүрүү» тармагына 25%, «айыл чарба продукцияларын иштетүү» тармагына 25% жумшалат», — дейт Ж.Сагынов.
