Бүгүн, 25-апрелде Жогорку Кеңеш жыйынында “Айыл чарба багытындагы жерлерди башкаруу жөнүндө” Кыргыз Республикасынын мыйзамына өзгөртүүлөрдү киргизүү тууралуу” мыйзам долбоору 2-окууда каралды.
Аталган маселе боюнча Агрардык саясат, суу ресурстары, экология жана региондук өнүгүү боюнча комитеттин төрагасынын орун басары Алмасбек Акматов баяндама жасады.
Анын айтымында долбоор аркылуу “Айыл чарба багытындагы жерлерди башкаруу жөнүндө” мыйзамдагы кемчиликтер менен айырмачылыктар жоюлуп, Жер кодексине шайкеш келтирилүүдө.
Мыйзам долбоорунда аракеттеги мыйзамдын 1-беренесиндеги айыл чарба багытындагы жерлер түшүнүгү эксперименталдык жана айыл чарба кооперативдерине багытталган, тажрыйба-селекциялык жана сорт сыноо иштерин жүргүзүү үчүн пайдаланылуучу жерлер менен толукталууда.
Мыйзам долбоору 2-окууда добуш берүүгө жиберилди.
