Эл аралык инвестициялык форумда авиациялык тармактын аналитиги Даир Токобаев Эл аралык “Манас” аэропортунун инвестициялык мүмкүнчүлүктөрү тууралуу пикирин билдирди. Токобаевдин айтымында, биринчи кезекте Кыргызстанда транзиттик хабды өнүктүрүүгө көңүл буруу зарыл.
“Баткендеги аэропортту Худжанддагы менен салыштыра турган болсок, Худжанд аэропорту акыркы 15 жылда өнүккөн жана миллион адамды кабыл ала алат, ал эми Баткендикине 2014-жылы эл аралык деген макам берилгени менен 50 миңге жакын жүргүнчүнү кабыл ала алат. Бул регионго инвесторлорду тартуу кыйын. Бирок, эгерде бул тармак тууралуу сөз кыла турган болсок, Ысык-Көлдөгү аэропортторго дагы инвестицияларды тартуу керек. Бирок бул регионго инвестиция тартуу жеңил болот, себеби туристтик аймак”,-деди аналитик.
Кыргызстандын эн башкы потенциалы Кытайга жакын жайгашканында.
“Дал ушул нерсе бул тармакка инвесторлорду тарта алат. Экинчиден, «Манас» аэропортундагы учуу-конуу тилкесин оңдоо керек болгону менен ал бетондон жасалган жана эл аралык каттамдарды кабыл ала алат. Башкаруунун чет элдик компанияларга, мисалы Turkish Airlines компаниясына берсе эмнеге болбосун? Бул баардык жагынан жардам бермек. Ушундай кадамдар жасалса туристтердин агымы көбөймөк, учуу-конуу тилкеси жасалса көп учактарды кабыл алмак”,-деди Токобаев.
Экинчиден, Кыргызстандагы транспорттук хаб Кытай чек арасынын жанында жана эң ыңгайлуу жерде жайгашкан.
“Туристтер тууралуу айтпасак деле, өлкө товарларды транзит кылуудан көп пайда болмок. Бул тууралуу көп жылдар айтылганы менен, эч ким инвестор издегиси келген жок. Тактап айтканда, иш жай жүрдү. Албетте, Ысык-Көлдүн аэропортторунда оңдоо иштерин жүргүзүү керек, бийлик инвестициялык планды бир нече жыл бою иштеп чыкты жана Кытайга жакын жайгашканыбыз башкы ролду ойнойт деген ойдомун”,-деди эксперт.
