Президент Алмазбек Атамбаев акыркы маалымат жыйынын өткөрдү
Иш-чара “Ала-Арча” мамлекеттик резиденциясында өтүп, ага 200гө чукул жалпыга маалымдоо каражаттарынын өкүлдөрү катышты. Президент журналисттер тарабынан жолдонгон 60ка жакын суроолорго жооп берди. Суроолор негизинен саясий, экономикалык, эл аралык мамиле жаатында болду.
Президент алты жыл ичинде өлкөнүн социалдык-экономикалык абалын жакшыртууга болгон күчүн жумшаганын, анын алкагында бир топ иштер аткарылганын белгиледи. Ошол эле учурда аткарууга жетишпей калган иштер да болгонун белгиледи.
Президент өткөн аптада болгон туруктуу өнүктүрүү боюнча Улуттук кеңеш боюнча токтолуп, өлкөнү 2040-жылга чейин өнүктүрүү стратегиясынын долбоору каралгандыгын эске салды.
Атамбаев: “Мөңгүлөр Кумтөрдүн айынан эмес, климаттык өзгөрүүдөн улам эрип жатат”
Президент маалымат жыйынында Жогорку Кеңештин депуттары тарабынан кабыл алынган “Суу кодексине” өзгөртүүлөрдү киргизүү мыйзамы тууралуу маселеге токтолду.
Ал кабыл алынган мыйзам болгону эки мөңгүгө гана тишелүү экенин билдирди.
Мамлекет башчысы атайын изилдеп Кыргызстанда 6771 мөңгү бар экенин билдирди.
Ошондой эле ал өткөн айларда БУУда сүйлөп жатып, мөңгүлөр Кумтөрдүн айынан эмес, дүйнөлүк климаттын таасири менен ээрип жатканын сүйлөгөнүн эске салды.
Атамбаев: “Кара-Кеченин келечеги инвестордо”
“Кара-Кечени тез арада инвесторго бербесек, келечекте эч кимге кереги жок болуп калат.” Мындай пикирин президент Алмазбек Атамбаев маалымат жыйынында билдирди.
Ат-Башы эркин экономикалык аймак болот
Президент Алмазбек Атамбаев маалымат жыйынын жүрүшүндө Нарын облусунун Ат-Башы районун эркин экономикалык аймак кылып түзүү зарыл экенин билдирди.
Президент Ат-Башы районуна качан эле логистикалык борбор курулуш керек экенин, аны ишке ашырууга Жогорку Кеңештин депутаттары бут тосуп келгенин билдирди.
Атамбаев: “Жээнбеков коррупция менен күрөшүүгө күчү жетет”
Президент Алмазбек Атамбаев жаңы президент Сооронбай Жээнбеков жумшак киши эмес экенин, жини келгенде “чык эшикке” деп баарын кууп чыгарын “Жаңы президент Сооронбай Жээнбеков жумшак киши, коррупция менен күрөшүүгө эрки жетеби?”,-деген суроого жооп берип жатып билдирди.
“Мегакомдун” акчасы “Коопсуз шаарга” жумшалышы керек
Президент Алмазбек Атамбаев “Мегаком” компаниясын сатып, андан түшкөн каражатка “Коопсуз шаар” долбоорун ишке ашыруу керектигин бүгүнкү өткөн маалымат жыйынында билдирди.
Кыргызстанда «Мегаком» деген бренд менен белгилүү болгон «Альфа Телеком» компаниясынын 100 пайыз акциясын бийлик өткөн жылдын февраль айында биринчи жолу сатыкка коюп, баасын 19 миллиард сомго баалаган. Бирок андан бери үч жолу сынак жарыяланып, ар бир жолку конкурста баасы төмөндөп олтуруп, акыры 13 млрд. 500 млн. сомго токтогон.
Күз айларында компанияны оруссиялык ишкер түз сатып алуу ниетин билдирген, бирок мамлекеттик мүлк фонду сүйлөшүү токтогонун билдирген.
Кыргызстанда “Коопсуз шаар” бир нече жылдан бери ишке ашпай келе жаткан долбоорлордун бири. Анын негизги максаты – жол кырсыктарын азайтууга, кылмыштуулуктун алдын алууга багытталган. Ноябрь айынын аягына чейин Бишкек жана Ош шаарларында аталган долбоордун алкагында фото-видео байкоо жабдуулары орнотуларын өкмөттөн билдиришти.
Атамбаев: “Россиянын президент кыргыз-казак чек арасына кийлигишүүгө чакырдым”
Маалымат жыйынында “Казакстан менен бир аз бузулган мамилени кантип оңдоого болот?” деген суроого президент Алмазбек Атамбаев төмөнкүдөй жооп берди.
Кыргыз-казак чек арасындагы чыңалган абал 10-октябрдан бери өкүм сүрүүдө.
Эгемен Кыргызстандын төртүнчү президенти Алмазбек Атамбаев мамлекет башчысы кызматына 2011-жылдын 1-декабрында киришкен. 24-ноябрда жаңы президент Сооронбай Жээнбековго президенттик ыйгарым укуктарын расмий түрдө өткөрүп бергени турат.
Назгүл Бостонбаева
