Кыргызстанда экспорт жана импортко багытталган атамекендик өндүрүүчүлөр мамлекеттен каржылык колдоо алышат.
Премьер-министр Сооронбай Жээнбеков кол койгон буйрукка ылайык, каржылоонун жалпы суммасы 350млн сомду түзөт. Бул тууралуу өкмөттүн Маалыматтык камсыздоо бөлүмүнүн башчысы Толгонай Стамалиева билдирди.
Маалыматка ылайык, каржы министрлиги долбоорду келерки жылы үч бөлүктө каржылайт. Өкмөт бул долбоор өндүрүштө жумушчу орундардын санын көбөйтүп, тышкы миграциянын деңгээлин азайтып, атаандаштыкты күчөтөөрүнө үмүт артууда.
—Импорт жана экспорт менен алектенген ишканалар жеңилдетилген насыяларды ала алышат. Долбоорго ылайык, ишканалар каржылык чыгымдарын азайтуу, продукциялардын сапатын жакшыртууга жабдууларды сатып алуу үчүн жеңилдетилген насыяларга жеткиликтүүлүгү камсыз кылынат. Аталган долбоорду ишке ашыруу социалдык-экономикалык сезилээрлик натыйжа берет. Мындан улам аталган программаны ишке ашырылышы Кыргызстандын жалпы экономикасына ар тараптуу натыйжа берет.
Долбоордун алкагында финансылык каражаттарды коммерциялык банктар жана адистештирилген финансы-насыялык мекемелер тарабынан ишкерлерге жеңилдетилген үстөк пайыз менен берилет.
