ЕАЭБ өлкөлөрүнө сүт азыктарынын экспорту 2017-жылы 30 пайызга өскөн. Бул тууралуу Ветеринария жана фитосанитария боюнча мамлекеттик инспекциясынын директорунун кеңешчиси Төлөнбек Ырсалиев: “Кыргызстан ЕАЭБдин талабында жаңы шартта кантип соода кылат” деген суроого жооп берди.
Анын айтымында, 2017-жылдын 12-августуна чейин Кыргыз Республикасында алынган сертификаттар дагы эки жыл бою, же 2019-жылдын 12-августуна чейин күчүндө болот, бирок ЕАЭБге мүчө мамлекеттерге азыкты экспорттоо үчүн жаңы техрегламенттерди киргизүү керек.
Ал эми Экономика министрлигинин техникалык көзөмөл жана метрология башкармалыгынын жетекчиси Султан Ахматовдун маалыматына караганда, 12-август күнү өлкөдө ар кайсы азыктардын сапатын жогорулатууну талап кылган ЕАЭБдин 18 регламенти күчүнө кирет.
“Сертификат берүүгө мүмкүн болбогон техрегламенттер боюнча биздин сертификат берүүчү органдар казакстандык жана орусиялык лабораториялар менен келишим түзүп, ошол жакка жиберет. Башкача айтканда өндүрүүчүлөр биздин органдарга барыщат, документтерди толтурушат, ал эми процедуралар аталган өлкөлөрдө жүргүзүлөт. Тигүүчүлөр үчүн лабораториялар техжардамдын алкагында каралган жана ишкерлер үчүн баардык шарттар түзүлөт”,-деди ал.
