Нарын облусунун Ат-Башы районунун Бирлик айылында жана Ак-Талаа районунун Эмгек айылында фельдшердик-акушердик пункттар ачылды. Бул тууралуу Саламаттыкты сактоо министрлигинин басма сөз кызматы билдирди.
Маалымат боюнча, аталган эки ФАПты курууга Түркия эл аралык кызматташуу агенттиги каражат бөлүп берген. Ар бир ФАП үчүн имараттарды курууга жана керектүү медициналык жабдыктарды сатып алууга 2 млн 228 миң сомдон акча каражаты жумшалды.
24-мартта эки фельдшердик-акушердик пункттардын ачылыш салтанаты болду.
Ачылыш аземдерге Түркиянын ТИКА уюмунун башчысынын орун басары Мехмет Сюррея Эр, ТИКА Бишкек координатору Али Муслу, Нарын облусундагы өкмөт өкүлү Аманбай Кайыпов, жергиликтүү бийлик өкүлдөрү, район акимдеринин орун басарлары жана айыл тургундары катышты.
