Баткенде кыргыз-өзбек биргелешкен ишканалары курулат. Бул тууралуу өкмөттүн Баткен облусундагы өкүлү Абиш Калмурзаев билдирди.
Кыргызстан менен Өзбекстандын ортосундагы чек аранын 85%ы демаркация болгондон кийин өткөрүү бекеттеринде каттамды жеңилдетүү менен эки элдин ортосундагы мамилени жакшыртып, жеке ишкерлерге шарт түзүү каралууда.
«Өзбек тарап бизден Ак-Турпактын күрүчүн экспорттообузду сурап жатат. Бул биз үчүн жакшы мүмкүнчүлүк. Анткени өткөн жылы 5 миң тонна күрүч алганбыз, быйыл андан кем эмес түшүм алабыз деп турабыз. Биз чек ара аймагында кыргыз-өзбек биргелешкен ишканаларын ачууну сунуштадык. Биздин бул сунушту өзбек тарап кабыл алды. Азыр биргелешкен ишканаларды ачуу боюнча жер караштырып жатабыз», — деди Абиш Калмурзаев
Анын маалыматына ылайык, өзбек тарап Ак-Турпак күрүчүн, Сүлүктү көмүрүн, Баткен өрүгүн, Лейлек районунун аймагындагы кварц кумун сатып алууга кызыкдар. Ошол эле учурда Өзбекстандан пахта кездемелерин, кийимдерин Кыргызстанга ташууну сунушташкан.
Эске сала кетсек, 2-октябрда Кыргызстан менен Өзбекстандын ортосундагы Кадамжай жана Вуадиль чек аралары ачылган.
КРнын Баткен облусу Өзбекстандын Фергана облусу менен чектеш, анын калкы 3,7 млн. Аймактар ортосунда 4 унаа жол, 1 темир жол өткөрүү бекеттери бар.
Учурда эки өлкө ортосундагы «Кызыл-Кыя» жана «Өзбекстан» көзөмөл өткөрүү бекеттерин ачуу маселеси каралууда.
