2017-жылдын 28-сентябрында ЕЭКтин аймагында Россельхознадзордун жетекчиси Сергей Данкверт КРнын өкмөтүнүн алдындагы Ветеринардык жана фитосанитардык коопсуздук боюнча инспекциясынын жетекчиси Калысбек Жумаканов менен жолугушту.
Ошондой эле жолугушуунун жүрүшүндө “Ак Сүт” ААКсынын өнүмдөрүн Орусияга ташууга убактылуу тыюу салынганы боюнча маселе дагы каралды. Калысбек Жумаканов изилдөөлөрдүн натыйжасында өнүмдөр Орусиянын ветеринардык жана санитардык талаптарына толугу менен жооп берери белгилүү болгонун билдирди. Изилдөөлөрдүн натыйжалары жазылган протоколдор Россельхознадзорго жөнөтүлгөн.
Мамлекеттик инспекциянын жетекчиси Орусия берген гранттын эсебинен республикага жаңы жабдуулар алынып келингенин жана лабораториялар оңдолгонун, бир катар кыргыз адистери орусиялык институттардан окуудан өтүшкөнүн белгиледи.
Сүйлөшүүнүн жүрүшүндө кыргыз тарап республикада куш этинин тартыштыгы болуп жатканын билдирип, Кытайдын кепилдиги менен куш этин алып келүү боюнча Россельхознадзорго кайрылды. Орусия кызматынын жетекчиси бул маселе боюнча расмий билдирүүнү карап чыгууга даяр экенин айтты.
