Мындан улам коомчулукта аэропорттор сатылат таризиндеги сөз тарап, кезек аэропортторго жеттиби? деген суроо жаралды. Бирок өкмөт аба майдандар сатылбастыгын, болгону эропорттун абалын оңдоо үчүн ишеним башкаруусуна берүү же чогуу башкаруу боюнча сөз жүрүп жатканын ачыктады. Өкмөт өкүлдөрү билдиргендей, азырынча бир жактуу чечим кабыл алына элек.
Премьер-министр Сапар Исаков Кыргызстан өз күчү менен аэропортторду өнүктүрө албастыгын Жогорку Кеңештин жыйынында депутаттардын суроолоруна жооп берип жатып билдирди. Өкмөт башчынын белгилөөсүндө аэропорттун өзүнүн 4 жылдык программасы бар. Анын негизинде алынган каражаттар аэропортту өнүктүрүүгө жумшалат. Реформадагы негизги нерсе – ошол ири компаниялардын артында чоң авиакопаниялардын турганы. Эгерде Кыргызстанга чоң компаниялар келбесе, анда Кыргызстанга чоң авиакомпаниялар келбейт.
Аэропорт жетекчилиги сатууга каршы
Эл аралык «Манас» аэропортунун башкармалыгынын башчысы Эмир Чукуевдин берген маалыматына караганда, соңку үч жылда аэропорттун кирешеси болуп көрбөгөндөй көбөйгөн. Маселен, өткөн 2016-жылы “Манас” аба майданы 1 млрд. 629 млн. сом киреше алып келген болсо, бул көрсөткүч 2015-жылга салыштырмалуу 262 млн. сомго көп болгон.
Аба майдан жетекчилиги алдыдагы 2–3 жылдын аралыгында аэропорттун сырткы жана ички көрүнүшү, тейлөө шарты дагы жакшыра турганын, бул иштерди аба майдан өз күчү менен ишке ашыра турганына көзү жетип турганын ырастады.
Өкмөттүн эмки үмүтү “Манас” жана “Ош” аэропортторун инвесторго берүү долбоорун парламент депутаттарынын колдоп берүусүндө. Деген менен эл өкүлдөрү арасында бул боюнча пикир бир кылка эмес. Айрым эл өкүлдөрү инвесторго аэропорт башкармалыгын берип, ошол эле учурда мамлекет акцияларына ээ болушу керек дешсе, айрымдары инвестордун колуна карматууга таптакыр каршы.
Зилалиев: “Аэропорт сатылбайт”
Күн мурун парламентте эки аба майданды сатуу мүмкүндүгү тууралуу маселе кайрадан козголду.
“Өнүгүү-Прогресс” фракциясынын депутаты Абдумажит Юсуров эгерде аэропорт сатылса, Кыргызстандын үлүшү канча болоруна кызыкты.
Мамлекеттик мүлк фондунун жетекчиси Дүйшөнбек Зилалиев буга жооп катары мамлекеттин үлүшү 79 пайыз болорун, бирок компанияны сатуу өкмөттүн планында жок экенин билдирди.
Ал аэропорт өлкө коопсуздугу менен байланышкан маселе экенин, аны өнүктүрүү үчүн гана инвестор изделип жатканын айтты.
Талдоочулардын баамында, аба майдандарды өнүктүрөм деген чет элдик компаниялар монополиялык бизнес кылбаса, анда Кыргызстандын бергени дурус. Мындай пикирин экономика тармагы боюнча талдоочу Искендер Шаршеев билдирди.
“Манас” эл аралык аэропорту ачык акционердик коомунун карамагында 11 аэропорт бар. Алардын ичинен киреше алып келгени дал ушул инвестор кызыгып жаткан “Ош” жана “Манас” аба майдандары. Калган тогуз аэропорт дотацияда турат. Жогоруда саналган эки аэропорт расмий маалымат боюнча жылына ички жана сырткы каттам боюнча 3 млн. жүргүнчүнү тейлейт.
2014-жылы АКШнын транзиттик борбору толук чыгып кеткенден кийин, “Манас” аэропортун андан ары өнүктүрүүнүн жолу изделе баштаган. Ошол кездеги кыргыз өкмөтү аба бекетти Батыш өлкөлөрү менен Түштүк Чыгыш Азияны байланыштырган транпорттук хабга айлантуу максатын койгон.
Назгүл Бостонбаева
