Бүгүн, 18-майда жазуучу Чыңгыз Айтматовдун 90 жылдыгын өткөрүү боюнча уюштуруу комитетинин жыйыны өттү. Ага өкмөт башчы Мухаммедкалый Абылгазиев катышты. Анда премьер-министр дүйнөлүк маданиятка жана адабиятка көрүнүктүү салым кошкон жазуучуга арналган бардык маарекелик иш-чаралар эң жогорку деңгээлде өткөрүлүшү керектигин белгиледи.
Мындан тышкары жазуучунун туулган жери Талас облусунун Шекер айылында «Чыңгыз-Ордо» маданий комплексинин жакшыртылган концепциясын түзүү сынагынын жеңүүчүсү болгон архитектордун долбоору сунушталды.
Абылгазиев Финансы министрлигине «Чыңгыз-Ордо» комплексинин курулушун республикалык бюджеттен каржыланган объектилерине киргизүүнү тапшырды.
Аны менен бирге Маданият, маалымат жана туризм министрлигинин Кинематография департаментине Чыңгыз Айтматовдун Саха Республикасы менен биргеликте жүргүзүлүүчү «Деңиз бойлой жорткон ала дөбөт» повести боюнча тасма тартууну тездетүү тапшырылды.
