Россиянын Федералдык миграциялык кызматынын кара тизмесине түшүү себептери
Федералдык миграциялык кызматынын кара тизмеси – 2013-жылы пайда болгон расмий документ. Ага Россиянын аймагында жүрүп административдик жана кылмыш кодексин бузгандар же каттоого өз убагында турбагандар кирет. Россияга сапар алган эмгек мигранттарга кара тизмеде бар же жок экенин Федералдык миграциялык кызматтын сайтынан
текшерип алуу сунушталып келет.
Патенттин убактысы өтүп кетсе, жол эрежесин бузгандыгы үчүн айып пулду төлөбөсө да кара тизмеге кирип калуу коркунучу бар экенин Борбор Азиядан келген мигранттар менен иш алпарган Дмитрий Копылов билдирди. «Негизи бул адамдарды издешпейт деле, бирок полиция кызматкерлери рейд жүргүзүп, текшерген учурда билинип калышы толук ыктымал. Бирок Россиядан башка жакка чыгуу үчүн чек араны кесип өтүү учурунда бул нерсе ачыкталат дагы, Россияга кирүүгө тыюу салынат»,-деди ал.
Өздүгүн алмаштыруу практикасы
Айрым учурларда мигранттар кара тизмеде экенин текшерүү учурунда гана билишет дагы депорт болуп кетишет. Бирок мекенине келип, аты-жөнүн өзгөртүп жаңы паспорт алып, Москвага жол тарткандар да бар.
Москвада көптөн бери иштеп жүргөн жана диаспора менен дайыма байланышын үзбөгөн мигрант, учурда кара тизмеге кирген мигранттар бул маселени дагы деле өздүгүн өзгөртүү менен чечип келе жатышканын билдирди. «Менин көптөгөн тааныштарым кара тизмеге түшүп калышыптыр, айрымдарына 3 ай, кээ бирлерине 6 ай, башкаларына 5 жыл Россияга кирүүгө тыюу салынган. Бирок алар үйүнө барышып, башка фамилияга өтүшүп кайрадан кайтып келишүүдө. Бул иш Кыргызстанда бир жумада эле жасалат»,-деди ал.
Кара тизмедеби же жокпу…
Ошентип ал бир жумада 15 миң сомго жаңы паспорт жасатып, Москвага келип, ишин улантууда.
Мигрант расмий түрдө кара тизмеден кантип чыга алат?
Федералдык миграциялык кызматтын кара тизмесинен чыгуунун расмий жолу да бар. Мигрант бир катар документтерди чогултуп, Россиянын Федералдык миграциялык кызматына жана өз бийлигинин атына арыз жазуусу керек. Биздин өлкө Евразиялык экономикалык биримдиктин мүчөсү болгондуктан Кыргызстандын жашоочулары үчүн кара тизмеден чыгуу суранычын жөнөтүү жана уруксат алуу алда канча жеңил. Практика жүзүндө карай туган болсок тажиктер жана өзбектер депортациялоого көп туш болушат.
Өз кезегинде «Миграция XXI кылым» фондунун президенти, Россиянын Федералдык миграциялык кызматынын директорунун мурдагы орун басары Вячеслав Поставнин кара тизмеден чыгууда өзбектерге жана тажиктерге салыштырмалуу Кыргызстандын жарандарына жеңилдиктер берилери тууралуу маалыматка ээ эмес экенин билдирди.
Миграциялык футбол
Кара тизмедеги эмгек мигранттар боюнча дагы бир маселе бар. Акыркы жумада кыргыздардын көбү кара тизмеге түшө баштаган. Бул жакында Россияда болчу Футбол боюнча дүйнө чемпиондугуна байланыштуу окшойт. Апрелдин аягынан баштап футбол болуучу шаарларда каттоого туруу эрежелери өзгөрөт. Мигранттар мурда бир жылдык каттоо алып келишсе эми мындай болбойт. Туристтер үчүн гана кыска мөөнөттүү каттоого туруу мүмкүн.
Чемпионатка байланыштуу россиялык органдар кара тизмеден сырткары миграциялык агымды азайтуунун башка бейрасмий жолдорун дагы колдонушууда. Тажикстандан жана Өзбекстандан келген мигранттар каттоого туруу үчүн баардык процедураларды өткөндөн кийин патент берүүдөн баш тартышып, анын себебин түшүндүрүшпөй эле. «Алар уруксат кагазынын мөөнөтүн өткөрүп жибербеш үчүн жана кара тизмеге түшүп калбайлы дешип кайра артка кетүүгө аргасыз болушууда»,-деди Вячеслав Поставнин.
Кыргыз мигранттары – саясий маселе
«Ооба Чемпионатка жакын масштабдуу рейддер өткөрүлүп, мигранттарды депортация кылышат. Мындай чектөөлөр бир жыл мурун Конфедерациялар Кубогу өткөндө да болгон. Ошол маалда өлкөгө келгендер бир сутка ичинде каттоого туруусу зарыл деп жарыяланган, бирок кийин ал мөөнөттү 3 күнгө чейин узартышкан»,-деди Вячеслав Поставнин.
