Убактылуу каттоосуз жүрүү мөөнөтү Кыргызстандын жараны Казакстанга кирген күндөн баштап саналат. Кыргызстандык Казакстандын аймагында 30 календардык күндөн ашык жүргөн учурунда Казакстандын ИИМде каттоого туруусу зарыл.
Ушундай эле эрежелер Кыргызстанга кыска мөөнөткө келүүгө ниеттенген Казакстандын жарандарына карата да колдонулат.
Буга чейин Казакстандын жарандары Кыргызстанда каттоосуз 30 күн жүрө алышчу, бирок Кыргызстандын жарандары Казакстанда 5 күндөн ашуун жүрө алышчу эмес. Былтыр Кыргызстандын миграция боюнча мамлекеттик кызматынын төрагасынын орун басары Алмазбек Асанбаев Казакстан ЕАЭБдин нормаларына ылайык, кыргызстандыктарга 30 күн каттоосуз жүрүүгө уруксат бериши керектигин жана казак тарап бул маселени чечүүнү создуктуруп жатканын билдирген болчу.
Бул абдан жакшы жаңылык, себеби көптөгөн кыргызстандыктар Казакстанда эмгектенип келишет жана аларга ар бир 5 күн сайын чек арадан өтө берүү бир топ оорчулукту жаратып келген.
