Нидерланд Королдугунун элчилигинин алдындагы Голландиянын Экономикалык кеңсеси Кыргызстандын агроөнөр-жай комплексин өнүктүрүүгө кызыкдар. Бул тууралуу КРнын Соода өнөр-жай палатасынын вице-президенти Рима Апасова менен болгон жолугушуу учурунда Голландиялык экономикалык кеңсенин жетекчиси Фредерик Олтхоф билдирди.
“2019-жылы Кыргызстанда Голландиянын бизнес-миссиясын уюштурууну пландап жатабыз. Тактап айтканда, Ысык-Көл облусунда жашылчаларды сактоочу жай курууга кызыкдарбыз. Белгилүү болгондой бул аймакта жемиштер, картошка көп айдалат жана түшүмдү сактоодо жардам бергибиз келди. Биз Чүй облусунун Сокулук айылындагы ишкерлер менен буга чейин иштешип, бир долбоорду ийгиликтүү ишке ашырганбыз. Анда голландиялык технологияларды колдонуу менен жашылча сактоочу жай курулган. Ошондой эле сууну тазалоочу жабдууларды ташуу менен да алек болууга кызыгып жатабыз, бул Ысык-Көл аймагы үчүн маанилүү”,-деди Фредерик Олтхоф.
Өз кезегинде Рима Апасова Кыргызстандын экспорттук мүмкүнчүлүктөрү тууралуу айтып берди. Ал учурда кыргыз балы, буурчагы, жаңгагы, кездемеси жана кол өнөрчүлүгү дүйнөгө таанымал болуп калганын баса белгиледи.
“Палата Кыргызстанда өнөктөштөрдү издөөдө Голландия тарапка колдоо көрсөтүүгө даяр. Бизде баардык облустарда Соода өнөр-жай палатасынын өкүлчүлүктөрү бар, алар активдүү иштеп келишет. Голландиялык компаниялар инвестицияларга жана жаңы технологияларга муктаж болгон башка аймактарды да изилдеп көрүүлөрү керек де ойлойм”,-деди Р.Апасова.
