2017-жылы тышкы соодалык товар жүгүртүү 12,5%га жогорулады. Бул тууралуу премьер-министр Мухаммедкалый Абылгазиев бүгүн, 14-июнда паламентте отчет берип жатып билдирди.
Анын айтымында, 2017-жылы республиканын тышкы соодалык товар жүгүртүүсү 12,5%га жогорулаган. Буга катар Евразиялык экономикалык аймактын өлкөлөрү менен товар жүгүртүү динамикасы өстү. Натыйжада, 2017-жылдын соңуна карата ЕАЭБ өлкөлөрүнө экспорттун көлөмүнүн жогорулашы – 27%ды, ал эми үчүнчү өлкөлөргө карай экспорттун жогорулашы 8,6% түздү. Ал эми, республикалык бюджеттин кирешеси 2016-жылга салыштырмалуу 16% жогорулап, 135 млрд сомду түздү.
«Салыктык кирешелер 10,2 % өсүп, 9,6 млрд сомго жогорулаган. Чыгымдарды оптималдаштыруу жана чектөө боюнча 2017-жылы көрүлгөн чаралардын натыйжасында бюджет тартыштыгын ИДПга карата 3,3 % деңгээлде сактап калууга мүмкүндүк болду. Бюджеттин социалдык секторго чыгашасы бюджеттин жалпы чыгымынын 52 % ын, же 79 млрд сомду түзүп, 2016-жылга салыштырмалуу 6 млрд сомго, же 8% жогорулады»,– деди Абылгазиев.
Ал эми пенсиянын орточо өлчөмү 6,4 %га өсүп, 5412 сомду түздү. Мында пенсиянын базалык бөлүгү 280 сомго жогорулап, 1780 сом өлчөмүндө түзүлдү. Өлкө боюнча орточо айлык акы 6,7 %га өскөн, же 2016-жылы 14,4 миң сом болсо, 2017-жылы 15,4 миң сомго жогорулаган. Бюджет эсебинен жөлөкпулдарга 5,7 млрд сомдон ашуун каржы бөлүнгөн. Бул 2016-жылга салыштырганда 300 млн сомго, же 6%га жогору саналат.
