1-январдан тарта ЕАЭБдин “Отун катары колдонуу үчүн суюлтулган газга болгон талап” тууралуу техникалык регламенти » (ТР ЕАЭС 036⁄2016) күчүнө кирди. КРнын Экономика министрлигинен билдиришкендей, жаңы техникалык регламенттин жоболорун ишке ашырууга Өнөр жай, энергетика жана жер казынасын пайдалануу мамлекеттик комитети жоопкерчилик алат.
Эске сала кетсек, техникалык регламент Евразиялык экономикалык биримдикке мүчө мамлекеттердин ортосунда бирдиктүү милдеттүү талаптарды коет.
Документ аркылуу суюлтулган газды ташуу, сактоо, маркировкалоо жол-жоболору жөнгө салынат. Техникалык регламенттин талаптарына ылайык, Бирликтин аймагында айланган суюлтулган газ сапаттуу болуп, бир катар маалыматтарды камтып турушу керек. Алардын ичинде – даярдаган тараптын аталышы жана товардык белгиси, анын дареги, маркасынын аты ж.б.
2018-жылдын 1-январында товардын талапка жооп берери тууралуу берилген документ 2019-жылдын ортосуна чейин жарактуу болот. Мындан сырткары 2019-жылдын 1-июлунда суюлтулган газды өндүрүүчүлөр сапаты тууралуу документи бар болсо улуттук мыйзамдарына ылайык суюлтулган газ чыгара алышат. Өнүм улуттук белги менен маркировакаланат.
Учурда Кыргызстанда ЕАЭБдин 36 техникалык регламенти иштеп жатат. 9 техникалык регламент 2018–2019-жылдары күчүнө кирет.
